Lambang Kerapatan Adat Nagari

 Kerapatan Adat Nagari adalah sebuah lembaga Adat yang ada di Sumatera Barat khusus nya di Minangkabau.

Pidato Adat Batagak Gadang Nagari Tanjung Sani

Oleh : Zulkifli St Janaik

Angku-angku niniak mamak
Nan gadang basa batuah

Nan tinggi tampak jauah

Nan dakek jolong basuo

Saumpamo buruang banamo rajo ali

Malayok kalawik lapeh mambubuang ka langik biru

Manukiak ka lereng bukik

Inggok di dahan kayu gadang

                        Kayu gadang tumbuah di padang

Dahan rampak badaun balun

Bungo labek babuah ranun

Nan Bakulik balampih ameh

Batangkai batampuak perak

Baisi pualam intan

Bapantang jatuah ka bawah

Jatuah kalangik tujuah tingkek

Tak namuah anyuik kailie

Anyuik ka kaki gunung Marapi

           

                        Tansano jatuah ka bawah

Cilako Alam sakutiko

Santano anyuik ka ilie

Karacunan ikan di lautan

Jikok mambalah maampulua

Tibo mamapek mandatari

Kalau maukua samo panjang

Andai manimbang samo barek

                        Nan mamegang haluan jo kamudi

                        Mamacik kunci baribu pintu

Gantiang Putuih biang katabuak

Tapegang tumah di Niniak Mamak

Angku angku Imam dengan Khatik

Suluah bendang dalam nagari

Palito tarang tangah kampuang

Tibo di kalam ka manyigi

Batamu lakuang ka manyilau

                        Duduak nyo nan manyingkalak

Aie ka ilie bapalapeh kan

Ikan takilek kanai jalo

Pandai Manjalo dalam rangsang

Pandai balafat ba ma’ana

Tau di Hadist nahu sharaf

Siang rintang dengan kitab

Malam rintang nyo jo pituah

                        Manjaleh kan baiak dengan buruak

Manantukan hala dengan haram

Ka unduang unduang ka Madinah

Ka payung panji ka sarugo

Palito tarang dalam kampuang

Palito di basa jo pangulu

Angku angku Cadiak tau Pandai

Urang nan arih bijaksano

Pandai marapek dalam aie

Pandai manarah manilantang

                        Balun bakilek lah bakalam

Bulan bakijok tigo puluah

Alun di liek nyo lah paham

Raso lah sampai dalam tubuah

Lamak indak karano santan

Elok indak karano bungo

Rancak indak karano ragi

Bapantang manih dek tangguli

                        Pandai baliau mangatokan

Lamak baliau manutua kan

Gumak gamiak dalam bakato

Patah lidah dalam barundiang

Sabuah indak ado nan sasek

Sabarih indak ado nan lupo

Tau di langia ka manimpo

Atau pun ranggeh ka malatiang

Paham di bulam ka bakicuah

Atau pun sapuah salah titik

                        Rampak rimbun batang andaleh

Babungo babuah mudo

Batang di lilik pancaringek

Di Langik urang lalu linteh

Baliau di baliak itu pulo

Itu lah warih nan bajawek

Kusuik bapantang tak salasai

Karuah bapantang ndak kajaniah

Pandai batenggang di banang salai.

Ibuk rangkayo Bundo Kanduang

Sumarak anjuang nan tinggi

Limpapeh rumah nan gadang

Acang acing dalam nagari

Amban puruak alun buniang

Urang nan duduak jo sukatan

Bundo Suri rang namokan

Tau di kiyeh kato sampai

Jaleh di ribuik ka mandingin

Atau Kulindan salah banang

                        Bagai kan pipit di jamuran

Panyantun ka anak yatim

Paibo ka anak dagang

Auih katampek mintak aie

Litak katampek mintak nasi

Malin Deman naiak todak turun todak

Naiak parahu pakai pidoman baliau indak

Angin bakisa baliau tau

Mancupak talago manduang

Kanai lah anak bagubalo

Apo nan cupak di bundo kanduang

Tau di adat rumah tanggo

Iduik ka tampek rang banaza

Mati ka tampek rang baniaik

Salendang dunia adaik limbago

Rang mudo bujang salamaik

Sarato gadih ranyik jintan

Parik paga dalam nagari

Bungo nan kambang dalam kampuang

Sumarak koto jo nagari

Nan capek kaki ringan tangan

Capek kaki ndak panaruang

Ringan tangan indak pamacah

Ciek di kakok duo jadi

Aso tarantang duo sudah

Alun di suruah nyo lah paham

Alun di tagah lah baranti

Pagaran kokoh koto jo nagari

Ramo ramo sikumbang jati

Katik endah pulang bakudo

Patah tumbuah ilang baganti

Pusako bajawek dinan mudo

Badabua ombak di muaro

Maampeh ka tapi pantai

Lalu manasak kapa seret

Nan salanggam bandua di tapi

Salirik tunggak di tangah

Malompek ka gulang gulang

Malimbak kalua banda

Taruih ka korong dengan kampuang

Kato kan lah di dalam nagari……………..

Iyo lah di Jorong………………………….

Di lingkuang salam kasado nyo

Siturak namo bilalang

Rang gadih pandai baniago

Bacupak mangko bagantang

Mango di angkek lah adaik jo pusako

Barambuih angin dari selatan

Datang nan dari indogiri

Bamega mega awan putiah

Balain rono awan itam

Tabang lah buruang ka sumaniak

Tabang nan lalu ka daratan

Nan sikua mangapak sayok

Nan lain maampeh paruah

Sayok Babilai aso aso

Paruah balampih dengan perak

Bulu babungkuih jo biludu

Kuku basapuah suro nago

Nan bakuruang di sangkak ameh

Talatak di rumah gadang

Tasangkuik di tiang tinggi

Pamenan anak sutan sutan

Pingitan anak rajo rajo

Buruang nan rancak nomor Satu

Asa samulo daulu nyo

Jo salam sambah di anjuang

Ka hadapan niniak dengan mamak

Sarato imam dengan katik

Taruih ka cadiak tau pandai

Lauik sati rantau ba tuah

Antah tuanku nan kiramaik

Rang dunie banyak nan sati

Galanggang nyato ba pinunggu

Badantuang patuih guruih tuhue

Mambaleh lalu ka salatan

Baralun lalu kamalako

Takambang payuang tiang tujuah

Payuang ka basaran rang dahulu

Mulo di niniak moyang kito

Sajak di RasuaNabi Yunuih

Di susun jari nan sapuluah

Di takua kan kapalo nan Satu

Mamohon mamintak ampun

Sarato limpahan kamurahan

Kapado angku niniak dengan mamak

Nyampang kok ado kilaf jo kilafat

Kilaf manaruah ka tinggalan

Nyampang tasasek dang juaro

Kok nyo tagawa simain pantan

Kok nyo tasalah rang pitunggua

Rila di pintak banyak banyak

Dari muluik sampai ka hati

Silaturahim jan lah putuih

Barih balabeh lah mananti

Cupak jo gantang lah manunggu

Utang di kami manyampaikan

Kato papatah caro minang

Patitih luhak nan tigo

Turun dari Datuak parapatiah nan sabatang

Di sabuik kato pusako

Kok di sabuik kato pusako

Kato sarek ba undang undang

Lamo bana tak namuah lupo

Banyak bana untuang tak ilang

Sabarih tak namuah ilang

Satitiak tak namuah lupo

Suri di batu kok nyo ilang

Luki limbago tingga juo

Turak turalun kain lakan

Ka suto kain sarung mandi

Elok Ranah nyo minangkabau

Rupo karambie tinggi tinggi

Cando pinang nyo linggayuran

Pudiang Ameh batimba Jalan

Labuah lorong pasa nyo rami

Banda baliku turuik bukik

Cancang latiah di niniak moyang

Tambilang basi rang tuo kito

Sawah di buek ba pamatang

Ladang di agiah babintalak

Padang di bari balingguri

Rumpuik di agiah bakarakatau

Kateh nyo taambun suri

Ka bawah ta kasiak bulan

Hak nyato ba nan punyo

Tibo di ganggam ka ba umpuak

Ta tumpu tumah ka niniak mamak

Bukik banamo langgam puri

Lurah banamo lubuak landai

Mandaki ka batu karak

Manurun ka ujung bukik

Ta tumbuak di ikua koto

Sasimpang jalan katiagan

Sungguh pun ambo tagak badiri

Bukan lah urang cadiak pandai

Taga dek patuah ka niniak mamak

Manuruik ka imam katik

Mambao adaik jo limbago

Limbago kato di sambah kan

Apo garangan namo sambah

Taradok niniak dengan mamak

Nan dudak di tika candiaman

Duduak di kasua nan bamaniak

Di lingkuang tirai langik langik

Di kiri rumpuik ba palangi

Di kanan judul mahadikam

Di ateh awan saribu lampih

Langkok jo cadiak tau pandai

Parapati tabag ka jirek

Inggok di batang kalapo gadiang

Rajo ba jalan baambo rakyat

Ambo nan indak ba sisampiang

Rila di pintak banyak banyak

Salam jo sambah pamulie kan

Banang saalai tali ramin

Panjang nan duo baleh dapo

Pangabek bingkai layang layang

Ukie nyo cancang pucuak manggih

Bari ba ikua ba kapalo

Pihak ka diri badan ambo

Ba cincin ameh alun lai mungkin

Disapuah baiak aso aso

Mancubo tagak di galanggang

Manyampaikan niaik dalam ati

Mambao adaik jo pusdako

Mungkin bakato ambo dinan salah

Barundiang ambo ado sasek

Salam takzim Angku angku pamulie kan

Salorong kampuang di lambah

Taratak jo koto tinggi

Sairing salam jo sambah

Dari tangah taruih ka tapi

Kalau saandak saandai nyo

Tabang buruang sarato sayok

Baranang ikan jo radai nyo

Kambang bungo sarato tangkai

Baru banamo samparono

Tapi baalah mangatokan

Tipak ka diri badan ambo

Ratok jaleh karano suka

Anti ulah dek larangan

Pai baru karano suruah

Galak nyato karano jujai

Alun nan tumbuah dari bumi

Sabagai undang dinan tuo

Papatah di niniak mamak

Patitih urang cadiak pandai

Jadi gurindam di dalam alek

Kabasaran di alam minang kabau

Zaedar panggilan ayah

Jendela panggilan bundo

Zaedar jendela dalam kampuang

Anak rang kuok jo bangkinang

Sumarak koto jo nagari

Gadih panutan samo gadang

Ambo anak ketek mudo matah

Ilimu alun sabarapo

Kok umua sataun jaguang

Darah baru satampok pinang

Manitah balun lai pandai

Baru ka tangah di galanggang

                       

Antah tabilang dinan sasek

Mungkin ta sabuik dinan salah

Rila di pintak banyak banyak

Salam jo sambah pa manuah i

Kato pituah ranah minang

Kato ba misa bama’ana

Duduak lah angku jo batanang

Pidato lamo ka kalua

Apo badakak di palano

Parmato jatuah kalambah

Duduak ambo lai batanyo

Tagak kan lai babilang sambah

Mangko di parsambah kan lah

Sambah Adam Syah Muhammad

Syah Bagindo Rasulullah

Nan manjunjuang dang Mangkuto

Dapek kiriman dari rajo

Iyo lah rajo dari makah

Sufa’at rajo banoruhum

Sapihak rajo banue cino

Nan tingga di pulau pauah nangko

Santuang adaik jo limbago

Banoruhum bapaga ameh

Banue cino bapaga intan

Minangkabau bapaga budi

Bapaga budi jo baso

Balingka taratik sopan

Badindiang sopan jo santun

Balantai mungkin jo patuik

Baisi kato mumpakaik

Baru banamo samparono

Serak baserai bungo lado

Kambang kulabu bungo taruang

Harun baun nyo bungo nangoi

Marembak masuak nagari

Adat batang mamegang dahan

Dahan nyato mamacik ranting

Tiok ranting mamegang tampuak

Tampuak nyato sangkutan buah

Tiok buah manganduang isi

Di kurai kurai ka banda

Tatangguak ikan gulamo

Di curai curai di papa

Di ungkai sitambo lamo

Sabarih tak mungkin ilang

Satitiak tak namuah lupo

Suri di batu kok nyo ilang

Adaik limbago tingga juo

Kok ilang pado rawik nyo

Di kaji pado asa mulo nyo

Ingek sabalun kanai

Kulimek sabalun abih

Rambu rambu di kida jalan

Takalo maso daulu nyo

Samusim maso saisuak

Samaso balun barabalun

Katiko langik basentak naiak

Bumi ma antam turun

Nabi Adam awa partamo

Nabi Nuah rasue ka tigo

Tajadi di tanah kuniang

Talatak ka tiang Arasy

Taeda ateh kurisi

Kurisi batabue intan budi

Baaleh jo kain suto

Suto banamo Ainal banat

Tanunan anak bidodari

Dalam sarugo tujuah tingkek

Kurisi kadudukan nan di pertuan

Iskandar Zulkarnain

Anak Zis Alaihi salam

Anak Adam nan kurang aso ampek puluah

Mangko batiup lah angin si dolak dolai

Babunyi gandang jo sarunai

Sarato rabab jo kucapi

Langkok bunyi bunyian dalam sarugo

Takambang payuang ubue ubua

Tando alamaik basuko ati

Kawin jo anak rajo ruhum

Dek izin takadia Allah

Allah Ta’ala Kayo sungguah

Dapek lah anak Tigo urang

Nan tuo Maharajo Alif

Nan Tangah Maharajo Dipang

Nan Bungsu Maharajo Dirajo

Pihak kapado Maharajo Alif

Turun Ka banuruhum

Maharajo Dipang turun ka banua cino

Pihak Maharajo Dirajo

Turun ka pulau ameh nangko

Di angku Maharajo Dirajo

Balaie inyo maso itu

Di ateh dandang nan sabuah

Cukuik jo cati bilang pandai

Nan datang nagari basa

Dek lamo dandang balaie

Di dalam lawik Baharullah

Tampak lah api takijok kijok

Gunung suatu maso itu

Di ateh puncak langgam puri

Banamo gunung Marapi

Mangko di tuju kan lah dandang ka sinan

Iyo di puncak gunung Marapi

Dimano titiak palito dibaliak telong nan batali

Dari mano asa niniak kito iyo di puncak gunung Marapi

Pisau si rawik bari bahulu

Di asah mangko bamato

Lawitan sajo maso dahulu

Baru banamo pulau paco

Tabang lah anggang dari lawuik

Di tembak datuak nan batigo

Badia sadakak tigo dautih nyo

Mambebek kambiang lari ka utan

Manyalak anjiang dalam kampuang

Bakukuak ayam dalam talua

Jatuah ka rumah datuak Suri Dirajo

Iyo di Pariangan Padang Panjang

Baisi kudo Samboroni

Ba palano ameh kan diri nyo

Bajambua intan dengan perak

Kamanakan manyambah laie

Mamak manyambah bathin

Kamanakan ba pisau tajam

Mamak kan iyo ba dagiang taba

Tagang nyo ba leo leo

Kok kandua nyo badantiang dantiang

Ikan di lawuik kanai jalo

Punai di rimbo manangguangkan

Badarak carano kaco

Badarai carano kendi

Padi nan samo rang gantang kan

Bajarak karano baso

Bacarai karano budi

Itu nan samo rang pantang kan

Kain sarono tigo ragi

Lah lusuah mangko di sasah

Jikok pandai bamain budi

Dalam aie badan tak basah

Atok aua ateh tungku

Urek nyo sarang sipasan

Langgundi di tangah padang

Sariak indak babungo lai

Mambuhue jikok mambuku

Mauleh jikok mangasan

Kalau budi dapek di urang

Cadiak indak paguno lai

Apo lah baju rang kinari

Guntiang lah sudah dari kadai

Apo nan cupak di nagari

Kato saiyo nan bapakai

Ganiah baturap jo biludu

Sisamping kain balapak

Pakain anak rajo rajo

Rumah gadang basandi batu

Adik kan iyo basandi sarak

Kato mumpakat jadi rajo

Malangkah di ujung karih

Bakato di ujung lidah

Lambang mangati samo barek

Andai maukue samo adie

Rumah gadang bari ba pintu

Nak luruih jalan ka dalam

Kok di balun sabalun kuku

Kalau di kambang saleba alam

Di balah balah di patigo

Di rawik pambalah rotan

Luak nyato tabagi tigo

Adat alam tabagi lapan

Luak di bagi tigo

Tanah data jo luak agam

Katigo luak limo puluah

Alun di caliak nyo lah paham

Raso lah tibo dalam tubuah

Adat alam di bagi lapan

Nan ampek tabang ka langik

Nan ampek tingga di dunie

                        Nan ampek tabang ka langik

Aso  bulan duo Mantari

Tigo Timue ampek Salatan

Nan Ampek tingga di bumi

Rumah gadang lumbung bapereng

Sawah bunta banda buatan

Nan ba padi si ranyik jintan

Padi si puluik rimbun daun

Ari ujan di kaka kaka

Ari paneh di lingkuik lingkuik

Sacotok indak di ayam

Lah abih mangko di sioh kan

Babaniah satampang cukuik

Basawah sajanjang langkok

Sabitan sacupak ganok

Mamakan urang tigo luak

Tabang lah buruang simantilau

Di panah anak parantauan

Takambang adaik Minang kabau

Iyo Pa tampek di Pariangan

Di sinan adaik mulo bagantang

Gantang sipuluik dengan padi

Disinan adaik ba mulo kambang

Kambang nan indak kucuik lai

Biriak biriak tabang ka samak

Mamakan buah sari bulan

Inggok di dahan kayu pontong

Dari Niniak turun kamamak

Dari mamak ka kamanakan

Itu lah warih nan ba tolong

Ramo ramo si kumbang jati

Katik endah pulang ba kudo

Patah tumbuah ilang baganti

Pusako ba jawek dinan mudo

Tabantang tirai langik langik

Takambang payuang ubua ubua

Di bawah awan saribu lampih

Nan di puhun saparinggoan

Iyo di dalam rumah gadang

Rumah gadang surambi aceh

Aceh surambi minangkabau

Nan salanja kudo balari

Salayang kubiang malayok

Salayok kilabang tabang

Satakok rang takok makan

Rantangan takok batagunan

Guntiang pincalang tak tabilang

Anjuang di lawuik ka samo nyo

Gonjong nyo rabuang mambacuik

Tuturan labah mangirok

Pancuang turang alang katabang

Paran jamba si ulangiang

Paran picak malintang naiak

Balua tipih malintang turun

Tunggak banamo kasandaran

Nan tuo si Majo lelo

Nan ketek si Majo kayo

Tiang tangah panunggu alek

Tiang tapi sambah manyambah

Di laman carano basa

Sandi banamo alue adat

Adat di alam Minangkabau

Mano lah nan ambo sambah kan

Di dalam koto jo nagari

Rumah nyato batunganai

Kampuang lai banan tuo

Nagari nyato ba pangulu

Jatuah mangkuto masuak lawik

Lalu di lilik ula bidai

Sia lah urang manyilami

Birowaro cati bilang pandai

Di bantuak sabuah jendela kaco

Bilang cati malukih kan nyo

Mangkuto sudah tukang di bunuah

Tak dapek di tiru tiru

Ndak dapek di asak asak

Sumpah satie di Minangkabau

Ilang gelang baganti gelang

Gelang baganti aso aso

Ilang gadang baganti gadang

Gadang di jawek dinan mudo

Bakukuak ayam birugo

Mambaleh ayam dalam kandang

Manyawuik kuriak sanggo nani

Mambaleh taduang jalak litak

Maningkah buruang putiah cotok

Sambuang manyambuang ayam banyak

Tuah talungguak di kinantan

Lamak indak karani santan

Rancak indang karano ragi

Elok indak karano bungo

Bapantang manih dek tangguli

Pandai nyo baliau mangatokan

Lamak baliau manutua kan

Gumak gamiak dalam bakato

Patah lidah dalam barundiang

Sabuah indak ado nan sasek

Sabarih indak ado nan lupo

Labuhan bana di hadapan

Pangulu nan arih bijaksano

Abih kato kasudahan hukum

Di laia kapa nan balabuah

Di batin nyo pelang nan marapek

Putiah kapeh dapek di liek

Putiah hati jo keadaan

Mangko pado hari sekarang kini nangko

Takambang payuang kabasaran

Baralun bunyi pupuik jo sarunai

Sarato agung jo talempong

Langkok rabab jo kucapi

Bunyi bunyian di nagari

Tando nyo rajo naiak tahta

Atau pun pangulu naiak nobat

Tungkek galah amaik di rajo

Si taba di baliak pakan

Kok salah tobaik lah ambo

Kok bana samo di amal kan

Kalilawa di pulau rimbang

Anak ruso mati tadabiah

Kok gawa mintak di timbang

Kok doso ampun nan labiah

Wabilahi Taufik wal Hidayah

Wassalamu’alaikum Wr Wb